Voldajentene trente med landslagslegender
Volda stilte med ei stor gruppe spelarar frå 2013-kullet då Hødd inviterte til treningssamlinga “Handballdraum” i helga.
Her møtast spelarar på tvers av klubbane på Sunnmøre og vert trent av store profilar.
Denne gongen var instruktørane ein legendarisk miks av landslagsstjerner og meritterte trenarar:
Kari Aalvik Grimsbø sto i mål for Noreg i mange år og har vunne ei drøss meisterskap med landslaget. Ho har vunne Champions League, jobba som målvaktstrenar og i seinare tid vorte heidra for innsatsen sin for norsk handball.
Glenn Solberg er ei legende i norsk herrehandball, og bar kapteinsbindet for Noreg i mange år. Han har også trenarerfaring på landslagsnivå, mellom anna for både Noreg og Sverige. I dag er han tilsett i Olympiatoppen.
Tredjemann i det eksterne trenarteamet under samlinga var Peter Pucelj, som har spelt på det slovenske landslaget og ei rekke seongar i Champions League med klubblag, før han no nyleg var i trenarteamet som tok Begsøy-herrane opp i eliteserien.
Hødd-trenarane Igor og Vedrana Terzic var som vanleg primus motorar for opplegget i Ulsteinvik. For dei handlar Handballdraum både om det sportslege og det sosiale. I tillegg til treningar over to dagar, er det tilbod om overnatting med pizzafest.
- Det sosiale er utolig viktig. Vi skal ha det kjekt på og utanfor bana og bli godt kjent med kvarandre, seier Verdana.
Og det lukkast dei med. Voldajentene storkosa seg, og fortalte om kjekke og flinke trenarar, nye øvingar og nye bekjentskap.
Dette skal vi bli med på fleire gonger!
Tusen takk til Hødd for ei super samling med mykje påfyll og inspirasjon.
